نہ ملے گا تجھے شبیر سا بھائی زینب
ڈھونڈنے جائے گی گر ساری خدائی زینب
نہ ملے گا تجھے شبیر سا۔۔۔
اپنے اشکوں سے جلا شامِ غریباں کے چراغ
توں ہے اٹھارہ چراغوں کی اکائی زینب
نہ ملے گا تجھے شبیر سا۔۔۔
جانے کیا شامِ غریباں میں ستم ٹوٹے ہیں
عمر بھر چین سے پھر سو نہیں پائی زینب
نہ ملے گا تجھے شبیر سا۔۔۔
دو پسر توں نے تو دو بازو دیئے غازی نے
پہلے تو رسمِ وفا توں نے نبھائی زینب
نہ ملے گا تجھے شبیر سا۔۔۔
سرخ یہ کس کے لہو سے ہوئی پوشاک تیری
لاش کیا سینے سے اکبر کی لگائی زینب
نہ ملے گا تجھے شبیر سا۔۔۔
پانی کو دیکھ کے کیوں کر نہ جگر ٹکڑے ہو
کھا گئی ہے تیرے غازی کو ترائی زینب
نہ ملے گا تجھے شبیر سا۔۔۔
ہائے کس شان سے نکلی تھی وطن سے زینب
کیسی غربت کو سمیٹے ہوئے آئی زینب
نہ ملے گا تجھے شبیر سا۔۔۔
روحِ عباسِ علمدار نہ تڑپے کیوں کر
بے ردا شام کے دربار میں آئی زینب
نہ ملے گا تجھے شبیر سا۔۔۔
سارے غم بھول گئے سرور و ریحان مگر
فرشِ غم ہے تیرے بھائی کی بچھائی زینب
نہ ملے گا تجھے شبیر سا۔۔