Efforts: Syed-Rizwan Rizvi
Pardesi kunbay walon ki yad jo teer chubhoti hay
Nana ke rozay par Sughra chupkay chupkay roti hay
Aanay walay bhai ka rasta takhti hay beemar behan
Bhai ki majboor jawani barchi khaye soti hay
Kis ka rona kaisay aansoo ashray ke din asr ke baad
Sughra apnay rukhsaron se gard e yateemi dhoti hay
Baap ke seenay par soti thi wo bhi aik zamana tha
Aik zamana ye hay Sakina khaak ke ooper soti hay
Akbar ki shadi ki tamanna haey muqaddar Sughra ka
Sehray ki larryan to nahi ashkon ke baal piroti hay
Jis ne ummat ki rahon may farsh bichaya pholon ka
Ummat us ke beemaron ki raah may kantay boti hay
Abr e khaali daman ko Salman kabhi khali nah kaho
Yaad e shaheed e Karb o bala may har aansso ik moti hay