Maqtal se yehi aati thi sada
Koyi na raha sannata hay
Pardes may aa kar kaun luta
Koyi na raha sannata hay
Allah ye kaisa manzar hay
Jo lash bhi hay wo be sar hay
Behta hay yahan khoon ka darya
Koyi na raha sannata hay
Hay aaj fizain bhi ghamgeen
Lashon ke sarhanay koi nahi
Chaayi hay falak par gham ki ghata
Koyi na raha sannata hay
Kuch khaimay nazar aatay hain jalay
Aur sookhay huay tootay koozay
Kia qafila tha ye pyason ka
Koyi na raha sannata hay
Ye lash hay kis shehzaday ki
Kis tarha hua seena zakhmi
Qismat ne sitam kis maa pe kiya
Koyi na raha sannata hay
Hain qad may barabar do lashay
Doobay hain lahoo ke darya may
Dono ko ajal ne loot liya
Koyi na raha sannata hay
Ye maara gaya hay kaun haseen
Sehra hay kaheen kangna hay kaheen
Kaise ye sitam dunya ne kiya
Koyi na raha sannata hay
Ik shair parra hay saahil par
Haibat ka abhi tak ye hay asar
Sehmi sehmi chalti hay hawa
Koyi na raha sannata hay
Har simt udasi chaayi hay
Teeron pay kisi neend aayi hay
Be goar o kafan lasha hay parra
Koyi na raha sannata hay
|