Na pooch mera Hussain kya hay?
Efforts: Syed-Rizwan Rizvi



Na pooch mera Hussain(as) kya hay?

Jahan-e-Azme Wafa Ka Paikar
Khrad ka Markaz, Junoon Ka Mahwar
Jamal-e-Zehra(as), Jamal-e-Haider(as)
Zameer-e-Inssan, Naseer-e-Daawar
Zameen ka Dil, Asmaan Ka Yaavar
Dayar-e-Sabro Reza ka Dilbar
Kamal-e-Eessar ka Payambar
Shaoor-e-Aman–o-Sukoon ka Paykar
Jabeen-e-Insaaniyat Ka Jhoomar
Arab Ka Sehra, Ajam Ka Zewar

Hussain(as) tasweer-e-Ambiya hay
Na pooch mera Hussain(as) kya hay?

Hussain(as) Ahl-e-Wafa Ki Bastee
Hussain(as) Aayeen-e-Haq Parsatee
Hussain(as) Sidq-o-Safa Ka Saathee
Hussain(as) Chashme Ana Kee Mastee
Na pooch mera Hussain(as) kya hay?

Hussain(as) Pesh az Adam Tasawoor
Hussain(as) Baad az Qayam-e-Hastee
Hussain(as) ne zindagee bikheree
Faza Se warna Qaza Barastee
Urooj-e-Haft, Aasmaan-e- Azmat
Na pooch mera Hussain(as) kya hay?

Hussain(as) ke Naqsh-e-Pa ki Masti
Hussain(as) ko khuld me na Dhoondo
Hussain(as) Mehnga, hay Khuld Sastee
Hussain(as) Maqsoom-e-Deen–o-Imaan
Hussain(as) Mafhoom-e- "Hal ata" hay
Na pooch mera Hussain(as) kya hay?

Hussain(as) dil hay, Hussain(as) Jaan hay
Hussain(as) Quraan ki zuban hay
Hussain(as) Sajdon ki sar zameen hay
Hussain(as) Zehnon ka aasmaan hay
Na pooch mera Hussain(as) kya hay?

Hussain(as) Zakhmo bharee jabeen hay
Hussain(as) Azmat ka astaan hay
Utha Raha hay, Jo lash-e-Akbar(as)
Hussain(as) boorrha nahin jawan hay
Na pooch mera Hussain(as) kya hay?


Hussain(as)Imman Ki Justajoo hay
Hussain(as) Yazdan kee Abroo hay
Hussain(as) Tanha Tha Karbala Me
Hussain(as) Ka Zikr Chaar Soo hay
Na pooch mera Hussain(as) kya hay?

Furaat Kee Nabz Ruk Gayee hay
Hussain(as) Masroof-e-Gufatagoo hay
Jahan Gulabon Se Kat gaya hay
Hussain(as) Shayad Lahoo Lahoo hay
Na pooch mera Hussain(as) kya hay?

Hayat Ke Irtaqa Se Pucho
Hussain(as) Payghambar-e-namo hay
Hussain(as) Ka Hosla Na Poocho
Hussain(as) Lut Kar bhee Surkharoo hay
Woh dekho fojon ke darmayan bhi
Hussain(as) Tanha datta hua hay
Na pooch mera Hussain(as) kya hay?

Hussain(as) Nikhra hua qalandar
Hussain(as) Biphra hua samandar
Hussain(as) Baste dilon se aage
Hussain(as) Ujrre dilon ke andar
Hussain(as) Sultan-e-deen-o-eemaan
Hussain(as) Afkaar ka Sikandar
Na pooch mera Hussain(as) kya hay?

Hussain(as) Se aadmee ka rutba
Hussain(as) hay aadmi Ka "Mandar"
Khuda Ke Bakhshish Hee Khema Zan hay
Hussain(as) Kee Saltanat ke Andar
Hussain(as) Daata, Hussain(as) Raja
Hussain(as) Bhagwan, Hussain(as) Sundar
Na pooch mera Hussain(as) kya hay?

Hussain(as) Akaash ka Rishi hay
Hussain(as) Dhartee ki aatma hay

Hussain(as) Fikr-o-Ana Ka Ghazee
Hussain(as) Jang Gaah Me Namazee
Hussain(as) Husn-e-Nayaz Mandee
Hussain(as) Aijaz-e-Be-Nayazee
Hussain(as) Aaghaz-e-jaan Nesaree
Hussain(as) Anjaam-e-Jaan Gudazee
Na pooch mera Hussain(as) kya hay?

Hussain(as) Tauqeer-e-Kar-Bandee
Hussain(as) Taaber-e-Kar-Saazee
Hussain(as) Mojiz Numaye Dauran
Hussain(as) Haq Ki Fasoon Tarazi
Hussain(as) Haara to youn ke Jaise
Hussain(as) Ne Jeet Lee Ho Baazi
Hussain(as) Saare Jahan Ka Waris
Hussain(as) KEHNE KO BE NAWA hay
Na pooch mera Hussain(as) kya hay?

Hussain(as) Payghambar-e-Baharaan
Hussain(as) Taskeen-e-Dilfigaraan
Hussain(as) Meer-e-Hejaz-e-Hastee
Hussain(as) Saalar-e-Shehsawaran
Ke Deeda-o-Dil ke Dash-o-Dar Me
Hussain(as) Tamseel-e-Abr-o-Baraan
Hussain(as) Tadbeer-e-Jaan faroshaan
Hussain(as) Taqdeer-e-Sogwaraan
Kabhee to Chashm-e-Hunar se Dekho
Hussain(as) Rashk-e-Rukhe Nigaran
Hussain(as) Husn-e- Mahe Muharram
Hussain(as) Hee Eid-e-Rozdaraan
Hussain(as) Sar-Maya Ambiya Kaz
Hussain(as) Aijaz-e-Auliya hay
Na pooch mera Hussain(as) kya hay?

Hussain(as) Ek Dil Nasheen Kahani
Hussain(as) Dastoor-e-Haq ka Baani
Hussain(as) Abbas(as) Ka Sarapa
Hussain(as), Akbar(as) Ki Naujawani
Hussain(as) Kirdaar-e-Ahl-Imman
Hussain(as) Meyaar-e-Zindagani
Hussain(as), Qasim(as) ki Kam-Numai
Hussain(as), Asghar(as) ki Bezubani
Hussain(as), Sajjad(as) Ki Khamoshee
Hussain(as) Baqar Ki Nauha khani
Hussain(as) Dajla ka Khush Saahil
Hussain(as) Sehra ki Bekarani
Hussain(as), Zainab(as) kee Kasm-o-pursee
Hussain(as), Kulsoom(as) ki rida hay
Na pooch mera Hussain(as) kya hay?