Efforts: Syed-Rizwan Rizvi
Sajjad ki ghairat ne dekhay
Kia manzar Shaam ki raahon may
Dekha hay Syed zadion ko
Be chadar Shaam ki rahoon may
Gardan ko jhuka kar rota tha
Jab dekha saja bazaaron ko
Bazaar may jab laey zaalim
Be parda parday daron ko
Abid ke jigar par chalta tha
Ik khanjar Shaam ki rahoon may
Pur khaar safar ka gham tha aur
Na sadma tauq aur berri ka
Ik dard shah e mazloom ka tha
Ik gham tha haram hain be parda
Guzra hay safar beemar ka bas
Ro ro kar Shaam ki raahon may
Durron ki aziyyat sehta hay
Zakhmo se khoon bhi behta ha
Aur Shaam ke logon se Aabid
Dil tham ke bas ye kehta hay
May itna sawali hoon de do
Bas chadar Shaam ki rahoon may
Sajjad tarrap kar kehta tha
Ye Shaam ke logon se aksar
Aey Shamiyon itna batlao
Kyun rehm nahi khatay ham par
Aulad e Payambar par barsay
Kyun pathar Shaam ki rahoon may
Naizay pe jo dekha sar Sheh ka
Beemar ne dil ko thaam liya
Farmaya baba dekhiye to
Ummat ne kaisa haal kiya
Phirta hoon haram ko sath liye
May dar dar Shaam ki rahoon may
Pardes may apnay shahr ka har
Ik mazar yaad aa jaa ta tha
Wo shaan o shaukat sooch ke hi
Ankhoon se lahoo barsata tha
Aata tha Madina yaad usay
Jab aksar Shaam ki rahoon may
Jo dard sahay hain Aabid ne
Tareekh bhulaey gi kyunkar
May dekh raha hoon rahon ko
May dekh raha hoon wo manzar
Hain ab bhi wohi bazaar sajay
Hain Safdar Shaam ki rahoon may