Kehtay thay ye Abbas Sakina se ke dilbar
De do hamay mashkeeza abhi latay hain bhar kar
Bas itna karam haal pe Ammo ke ye kar do
Baba se riza ran ki dila do hamain ja kar
Ye suntay ke mashkeeza Sakina ne uthaya
Pohonchi liye Ammo ko huzoor e Shah e Safdar
Seenay se lipat jao chacha ke karo rukhsat
Tab jayain sooye nehr teri mashk ko le kar
Ho jaye agar dair to ghabrana na bibi
Pani abhi layain gay jo aa jaye mayassar
Tum tarrpo gi ya ro gi ya noha karo gi
Ham bhi wahan din raat guzarain gay tarrap kar
Parrhtay huay ye Noha alam laye sheh e deen
Matam karo maray gaye Abbas e dilawar
Woh soz day nohay ko Anees aap ke Zainab
Sun le to kaleja phatay ronay lagay pathar
|