Jo dil may Karbala aabad rakhay
Efforts: Syed-Rizwan Rizvi

Jo dil may Karbala aabad rakhay
Khuda us ko sada aabad rakhay

Duyain Fatima detain hain us ko
Ke jo farsh e aza aabad rakhay

Ali ke zikr se khush honay walay
Tujhay mushkil kusha aabad rakhay

Pisar de kar kaha raahib ko Sheh ne
Ke ja tujh ko Khuda aabad rakhay

Ali ke bughz may barbad hay jo
Usay ab koi kia aabad rakhay

Usay kaise mita paye gi dunya
Jisay Mola Raza aabad rakhay

Mila hay jo azadari ka ham ko
Khuda ye silsila aabad rakhay

Khuda wanda har ik ahle aza ko
Hay Zehra ki dua aabad rakhay

Tumhari is qalam kari ko Yasir
Janab e Syeda aabad rakhay