Aey mujrae chaman ki fiza hay aza pasand
Efforts: Syed-Rizwan Rizvi

Aey mujrae chaman ki fiza hay aza pasand
Shabnam kali ko phool ko chak e qaba pasand

Matam may Sheh ke phoolon ki chadar liye bahar
Har nakhl e sabz posh ko shan e aza pasand

Sabza bichaye farsh e azadariya Hussain
Sumbal ko na durustiye zulf e duta pasand

Har sarw apni jaan par uthay huay alam
Sabit qadam jo hain to hay rasm e wafa pasand

Akbar ko jitna rang e shahadar hua azeez
Itni hui na surkhiye barg e hina pasand

Talkhi to moat may hay magar haq ke wastay
Qasim ko shehd se bhi tha ye zaeqa pasand

Asghar ko apni moat par bas aa gayi hansi
Thi is kali ko moaj e naseem e baqa pasand

Ashk e ghulam o zakhm e sar e Hur ko fitratan
Romal e paak e bint e Rasool e Khuda pasand

Pohoncha day zoar e gardish e taqdeer koi din
Ahsan ko hay dua se Sheh e Karbala pasand