Kaamil hua hay deen Khuda ka Ghadeer may
Efforts: Syed-Rizwan Rizvi

Kaamil hua hay deen Khuda ka Ghadeer may
Jab noor dast e noor pe aaya Ghadeer may

Kuch is tarha Rasool ke hathon pe hain Ali
Jaisay simat ke aa gaya Kaaba Ghadeer may

Jana jo chahta tha to jaltay thay us ke paoon
Tha sab pe aaftab ka pehra Ghadeer may

Seenay pe aayaton ko utara gaya magar
Nuqta Nabi ke hath pe utra Ghadeer may

Chehray bata rahay thay pata sab ke khoon ka
Naslon ka imtehan hua tha Ghadeer may