Fursat milay to soch samajh kar jawab do
Efforts: Syed-Rizwan Rizvi

Fursat milay to soch samajh kar jawab do
Hay kon janasheen e Payambar jawab do

Baiyat sawal ho to mukarrar jawab do
Ik lehja e azaan may bahattar jawab do

Sooron ko hifz kar ke koi faida naheen
Quran ki aayaton ko samajh kar jawab do

Hay kon kainat may Abbas ke siwa
Jo rok lay nigahon ka lashkar jawab do

Wo kon hay batao zara jis ke wastay
Khutbay ko roktay hoon Payambar jawab do

Kehnay ko soorma to bohat thay jahan may
Kis ne utha liya dar e Khaibar jawab do

Soya hay kon chain se taighon ki chaoon may
Hay kon aik shab ka Payambar jawab do

Zikr e gham e Hussain ka tum par asar nahi
Pehlu may dil hay ya koi pathar jawab do

Jab keh chukay ghadeer may bakhin laka Ali
Nazron may kyin khatkta hay mimbar jawab do

Kis ne lahoo se dasht may likha hay La ilah
Jeeta hay kon sar ko kata kar jawab do

Zoar e nazar se jis ko bhagaya tha shair ne
Kiya ho gaya wo Shaam ka lashkar jawab do

Pani samait layain hain Abbas mashk may
Kia reh gaya Furaat ke andar jawab do

Chorrain na gar nihar to Qambar bhi kia karain
Hay josh may sakhawat e Haider jawab do

Nara Ali ke naam ka kartay hain ham buland
Behr e saboot e daman e madar jawab do

Maloom hay har aik ko roza Hussain ka
Hay turbat e Yazeed kahan par jawab do

Asghar se maa ke sheer ki taseer ne kaha
Beta! sitam ke teer ka hans kar jawab do