May hoon Kaaba mujhe Allah ka ghar kehtay hain
Efforts: Syed-Rizwan Rizvi

May hoon Kaaba mujhe Allah ka ghar kehtay hain
Markaz e sajda e masjood hoon Kaaba hoon may
Masnad e Mabood hoon Kaaba hoon may
Maqsad e Rab ka maqsood hoon Kaaba hoon may
Roz e awwal se hi mojood hoon Kaaba hoon may
   Azmat e Noor e wilayat se sajaya hay mujhe
   Hukm e Allah se nabyon ne banaya hay mujhe

Hay zamon se siwa khalq ke maiyar meray
Ambiya aur malayak huay zawwar meray
Fikr e insaan may samatay nahi anwaar meray
May hoon masoom ke masoom hain maymar meray
   Silsila meri tajalli ka kahan rukhta hay
   Samnay meray to nabiyon ka bhi sar jhukta hay

Kon samjha hay mujhe kia hay mera soz o gudaz
Meray anwaar se roshan may zamano may hijaz
Meri tajseem may Allah ne rakha hay ye raaz
Mujh se phir jaye agar chehra to baatil hay namaz
   Mujh ko Allah ki amzat ka nishan kehtay hain
   La makaan hay jo Khuda us ka makaan kehtay hain

Kabhi socha ke ye aijaz mujhe kaise mila
Ye ibadaat ka andaz mujhe kaise mila
Azmaton ka par e parwaz mujhe kaise mila
Kabhi socho ke ye aizaz mujhe kaise mila
   Meray hissay jo ye auj e azali aaya hay
   Misl e Quraan meri jholi may Ali aaya hay

Meri azmat meri qamat pe zara ghor to kar
Meri taqdees pe hurmat pe zara ghor to kar
Meri ronaq meri zeenat pe zara ghor to kar
Aey bashar meri haqeeqat pe zara ghor to kar
   Ye sharaf mera hay Khaliq ka Wali rehta hay
   Ghar hoon Allah ka par mujh may Ali rehta hay

Aisi kab tha mera mayar Ali se pehlay
Is qadar kab tha may shahkar Ali se pehlay
Mujh may kab aaye thay anwaar Ali se pehlay
May tha but khana e Kuffar Ali se pehlay
   Kar diya amr e ulil amr na Kaaba mujh ko
   Naqsh e Haider ne kiya laeq e sajda mujh ko

Meray daman may bharay rehtay thay Kuffar ke butt
Butt paraston ke liye thay sabhi maiyar ke butt
Thay ajab mossavi tareek e kirdar ke butt 
Yani Allah ki touheed se inkaar ke butt
   Rabtay Rab se nusehri ka Khuda joarr gaya
   Aik hi waar may har jhoota Khuda toarr gaya

Naqsh e Haider se haseen kal bhi tha aur aaj bhi hoon
Farsh par arsh naseen kal bhi tha aur aaj bhi hoon
Dil e momin may makeen kal bhi tha aur aaj bhi hoon
May wilayat ka ameen kal bhi tha aur aaj bhi hoon
   Aamad e Haider e Safdar ka bayan aaj bhi hay
   Meri peshani pe sajday ka nishaan aaj bhi hay

Paey Haider ke saba paaya hay Khaliq se sharaf
May Imamat ke gohar ke liye thehra hoon sadaf
Ahle eeman paye Hajj aatay hain jab meri taraf
May wuzoo kar ke chala jaata hoon us roz Najaf
   Dekhnay jata hoon may Rab ke wali ka roza
   May hoon Kaaba mera Kaaba hay Ali ka roza

Meri har samt hay Allah ke sajdon ki asaas
May hoon touheed shanasa ke hoon Shabbir shanas
Hay Najaf mera bharam Karb o bala hay meri aas
Chowda soo saal se tan par hay meray kaala libas
   Dil se dard e dil e Shabbir bhulaya hi nahi
   Bakhuda may ne kabhi soag barrhaya hi nahi

Meri pehchan bana hay ye mera kaala libas
Kis qadar mujh pe jacha hay ye mera kaala libas
Mujh se wabasta raha hay ye mera kaala libas
Haan tabarruk may bata hay ye mera kaala libas
   Kaalay malboos may ghamkhar nazar aata hoon
   Hajiyon ko bhi azadar nazar aata hoon

Khoon e Sarwar ke chiraghoon ne ziya di hay mujhe
Karb may Karb o bala hi ne dawa di hay mujhe
Khaak par khaak e shifa hi ne shifa di hay mujhe
Nok e naize pe katay sar ne baqa di hay mujhe
   Is liye karnay ada haqq e wafa jata hoon
   Ban ke zawwar may khud Karb o bala jata hoon

Samnay hota hay jab meray namazon may qayam
Qaym e Aal e Muhammad ko may karta hoon salam
Iltija karta hoon aey Noor Ali un se madam
Parda e ghaib ulat dijye ab meray Imam
   Martaba mera zara aur barrha de Maula
   Chat pe aali jaanamaz bicha de Maula