Surmayi sham ke mahool may khonay walo
Efforts: Syed-Rizwan Rizvi

Surmayi sham ke mahool may khonay walo
Kis taraf jao gay jab subh e qayamat ho gi

Saf e Awwal may ameeron ko bulaye ga Imam
Kia khabr thi ke musallay pe siyasat ho gi

Zo fishan dahr may jab sham e Imamat ho gi
Munkir e ghaib pe har simt se lanat ho gi

Janamz apni jo pani pe bichain gay Huzoor
Hath jorray kharri mehrab e ibadat ho gi

Pairahan taqway ka ankhon ko pinhao warna
Nangi aankhon ko na Mehdi ki ziarat ho gi

Jin ki peshani ne chooma na kabhi khak e shifa
Aisay logon ki bhala kaise shifaat ho gi

Pyas us us ki bujhain gay Ali Kausar se
Jin ke roomal may Zehra ki amanat ho gi

Deen e Islam pe aanch aaye gi jab jab Meesam
Panch Bara ki Bahattar ki zaroorat ho gi