Maymar-e-arz-e-Karb-o-bala - May Hussain hoon
Efforts: Syed-Rizwan Rizvi

Maymar e arz-e-Karb o bala - May Hussain hoon
Nokar bani hay jis ki qaza - May Hussain hoon

Is poori kainat may Shabbir ke siwa
Guzray bohat wali o nabi aali marbata
Laikin koi bhi keh na saka - May Hussain hoon

Raahib ke 7 betay to mamooli baat hay
Meray to ikhtiar may kul kainat hay
Jo chahoon jis ko kar doon ata - May Hussain hoon

Bhatka hua tha raah e mawaddat tak aa gaya
Naar e safar ko chorr ke Jannat tak aa gaya
Jab Hur pe raaz khulnay laga - May Hussain hoon

Meray liye Nabi ne jo sajda barrha dia
Khaliq se may ne wada usi waqt kar liya
Qarza utaar doon ga tera - May Husain hoon

Waqif nahi hain woh meray jah-o-jala se
Bayyat talb hay Fatima Zehra ke laal se
Shayed Yazeed bhool gaya - May Hussain hoon

Chamkay hain meray noor se zarray zameen ke
Tum kia sikhao gay mujhe qanoon deen kay
Islam meray ghar may pala - May Hussain hoon

Ik din may wasf-e-faateh-e-Khaibar bana diya
Lori may kia Hussain ne us ko suna diya
Asghar bhi ran may kehnay laga - May Hussain hoon

Mumkin nahi jo kaam had e mumkinat se
Karb o bala ki khak pe khaki hath se 
May ne likhi kitab e wafa - May Hussain hoon

Tu matmi hay mera mujhe bhi hay yeh khabar
Laikin meray amal se Takkulum amal bhi kar
Phir bakhsh doon ga teri khata - May Hussain hoon