Qaid e tanhai may dam ghutnay laga hay mera
Efforts: Syed-Rizwan Rizvi



Qaid-e-tanhai may dam ghutnay laga hay mera
Aa ke seenay se lagao baba

May andheray may akeli hi na mar jaoon kaheen
Mujh ko marnay se bachao baba

1) May teri yad may din raat yun tarrapti hoon
   Jaisay pinjray may koi ghayal parra ho panchi
   Moat ka khouf hay sannata hay veerani hay, meri imdad ko aao baba
   Qaid-e-tanhai may dam ghutnay laga hay mera, aa ke seenay say lagao baba

2) Mujh ko aadat hay teray seenay pay sar rakhnay ki
   Chain ki neend bhala kaisay zameen par aayey
   Qaid khanay may to parrti hay bala ki garmi, apni goadi may sulao baba
   Qaid-e-tanhai may dam ghutnay laga hay mera, aa ke seenay say lagao baba

3) Meray dada nay reha kitnay kiye thay qaidi
   Us ki pooti hoon magar qaid may majboor hoon may
   Naam le ke tera ronay nahi deta zaalim, ab meri qaid churrao baba
   Qaid-e-tanhai may dam ghutnay laga hay mera, aa ke seenay say lagao baba

4) Phupiyon ke bhi bandhay hath pas-e-gardan hain
   Woh bhala kaisay meri aankhon se aansoo pochain
   Besahara hoon yateemi ka karra mausam hay, apni soorat to dikhao baba
   Qaid-e-tanhai may dam ghutnay laga hay mera, aa ke seenay say lagao baba

5) Yad besheer ki aati hay mujhay sham o sahar
   Us ka jalta hua jhoola bhi nazar aata hay
   Mujhay mil jao meray marnay se pehlay aa kar, sath Akbar ko bhi lao baba
   Qaid-e-tanhai may dam ghutnay laga hay mera, aa ke seenay say lagao baba

6) Nok-e-Neza pe jo kartay thay tilawat Maula
   Janay kia soch ke Akhtar ye Sakina ne kaha
   Shaam ke log to behray hain samajh saktay nahi, in ko Quran na sunao baba
   Qaid-e-tanhai may dam ghutnay laga hay mera, aa ke seenay say lagao baba