Lay chalo mujhay baba
Efforts: Syed-Rizwan Rizvi

Haay janib-e-karb-o-bala, jab chala shehr-e-muhammad say qafla sheh ka, 
Fatima Sughra yeh karti theen buka, lay chalyey mujhay baba (x4)

lay chalyey mujhay baba (x4)

1) Takleef naheen doongi rastey main koi baba, 
   Asghar ki qasam khakar ye karti hu mein wadaa, 
   hay saath main Asghar wo phool sa paiker, 
   roey ga agar god main behlaaoungi baba 
   lay chalyey mujhay baba (x4)

2) Veeran say is ghar main kis tarha jeeongi main, 
   din raat isi gham main bas roti rahoungi main, 
   mar jayengi sughra bin aap kay baba, 
   tanhayi kay is dard say ghabraoungi baba 
   lay chalyey mujhay baba (x4)

3) Kis tarha gham-e-furqat seh payenga dil mera, 
   hujron main meri nazrain dhondaingi tumhain baba, 
   royengi ye muztar bethi huwi dar par, 
   ro ro kay yahan jaan sey guzar jaongi baba 
   lay chalyey mujhay baba (x4)

4) Aghosh main asghar ko main jhoola jhulaongi, 
   main dhoop ki shiddat sey bhayya ko bachaongi, 
   mat chor kay jane deti houn sadaen, 
   bimar houn is tarha naa jee pawungi baba 
   lay chalyey mujhay baba (x4)

5) Kya guzreyngi is dil par jab hongey nahin akbar, 
   ho jaongi main sadqey bhayi ki muhabbat par, 
   yeh zakhm jigar par seh pawungi kyukar, 
   Akbar ki kasam jaan sey guzar jaongi baba 
   lay chalyey mujhay baba (x4)

6) Mangungi naheen hargiz rastey main dawa baba, 
   bas aap ki shafqat say paongi shifa baba, 
   nikloongi safar par har dard bhulakar, 
   shikwa main kabhi lab pay naheen laongi baba 
   lay chalyey mujhay baba (x4)

7) Sehra bhi naheen dekha ham shakl-e-payamber ka, 
   kya khwab sajaati thi is din kay liye baba, 
   matti main milain gey jo khwab they merey, 
   is khwab ke tabeer kahan pawungi baba 
   lay chalyey mujhay baba (x4)

8) Kab meney kaha baba mehmil main jagadedo, 
   is qafley main mujh ko chalney ki raza dedo, 
   seh loongi main zehmat lekin gham-e-furqat, 
   ek pal kay liye bhi na main seh pawungi baba 
   lay chalyey mujhay baba (x4)

9) Phir kehney lagey maula sughra ka bayan sunkar, 
   mehzar main naheen tera jab naam meri dukhtar, 
   ab too hi bata dey ley jaaon main kaisey, 
   kyun keh kay rulati hey kay marjaaongi baba 
   lay chalyey mujhay baba (x4)

10) Bimar houn laghar houn par aap ki sheda houn, 
    sochen to zara baba main soorat-e-zehra houn, 
    kuch reham to khaen mat chor kay jaaen, 
    tanha main lahoo aankhon sey barsaon gi baba 
    lay chalyey mujhay baba (x4)

11) Dunya main kaheen aisa dastoor naheen dekha, 
    ghar waley to sab jaen ek beti rahey tanha, 
    koi bhi na hoga jab chahney wala, 
    deewaron say sar apna main takraon gi baba
    lay chalyey mujhay baba (x4)