Alwida aey behan alwida
Efforts: Syed-Rizwan Rizvi

Alwida aey behan alwida
Bolay Shah-e-zaman alwida

1) Qatal ka meray lamha qareeb aagaya (x2)
Ek andhera sa charon taraf chagaya (x2)
Waqt say pehlay suraj bhi gehna gaya (x2)
May hu tanha mera haar sahara gaya (x2)

2) Chaltay chaltay faqat tumsay hay ek sawaal (x2)
Meri pyaari Sakina ka rakhna khayaal (x2)
Bin meray zinda rehna hay iska mohaal (x2)
Meri bachi ko honay na daina malaal (x2)

3) Jab giroon apnay ghoray say sooy-e-zameen (x2)
Aur jhuka doon may sajday may apni jabeen (x2)
Mujhko zibha karega jo Shimaray layeen (x2)
Tum na aajana khaimay say baahar kaheen (x2)

4) Meray kunbay ki ab ho tumhi paasbaan (x2)
Hay mera janasheen laghar-o-natawan (x2)
Rahay Kufa hai zanjeer aur bariyaan (x2)
Ab tumharay hawalay hay ye karwaan (x2)

5) Lootnay aaye khaimoon ko jab ashqiya (x2)
Ho sakay toh bacha layna apni rida (x2)
Sabar karna na karna kabhi bad-dua (x2)
Har qadam par madadgar hoga Khuda (x2)

6) Yun na gardish may aaya sitara kabhi (x2)
Yun huay thay na hum bay sahara kabhi (x2)
Sath ek pal na choota hamara kabhi (x2)
Ab na aayega bhaye tumhara kabhi (x2)

7) Ay behan aisi bhi aayegi rehguzar (x2)
Jab milay tumko rastay may Shireen ka ghaar (x2)
Aur pehchan lay tumko Shireen agar (x2)
Kehna waada hua poora ay khushsiyar (x2)

8) So gaye khaak paar tashnalab shah-e-deen (x2)
Jal gaye khaimay aur chaadarain chin gayeen (x2)
Ho gaye khali Shabbir say ye zameen (x2)
Ik sadaye alaam aaj tak hay yaheen (x2)

9) Bhej mehshar gharibul watan par salaam (x2)
Tashnalab khasta tan bay kafan par salaam (x2)
Shah kay ansaar par panjatan par salaam (x2)
Ek bhayi peh aur ik behan par salaam (x2)