مومنو طُوس کے سردار کا ماتم کر لو
سارے عالم کے مددگار کا ماتم کر لو
جِس کو انگور میں دھوکے سے دیا زہرِ جفا
بے خطا مارے گئے دیں دار کا ماتم کر لو
انّا للہ علی بن موسیٰ رضاؑ مارے گئے
خون میں ڈوبی ہوئی دستار کا ماتم کر لو
یہ ہے اولادِ علیؑ موسیِٰ کاظمؑ کا پسر
جانشیں حیدر کرّارؑ کا ماتم کرلو
وہ معینُ الضعفا اور غریبُ الغُربا
بے سہاروں کے طرفدار کا ماتم کر لو
اِس جنازے پہ کوئی رونے کو بیٹی نہ بہن
آؤ اِس اُجڑی-ہوئی سرکار کا ماتم کرلو
پھر سے زہراؑ کو رُلایا ہے بہت ظالم نے
ظُلم سے برسرِ پیکار کا ماتم کرلو
جو کہ شبیرؑ کے غم میں رہا مغموم سدا
ہائے شبیرؑ کے غمخوار کا ماتم کرلو
زندگی ساری رہا دُور وطن سے تنہا
اُس غریبُ الوطن-و بے یار کا ماتم کر لو
ضامنِ آہُو بھی ہے دین کا سلطان بھی ہے
دین کے مُونِس و غمخوار کا ماتم کر لو
ہم نے تابُوت اُٹھایا ہے رضاؑ مَولا کا
دینِ اسلام کے جرّار کا ماتم کر لو
رو کے کہنے لگے رضوان عزاداروں سے
مومنو حق کے علمدار کا ماتم کر لو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جس جنازے پہ فُغاں کرنے کو آئیں زہراؑ
آلِ احمد کے وفادار کا ماتم کرلو
وہ جو معصوم بھی ہے بارہ اماموں میں بھی ہے
دین کے حامی طرفدار کا ماتم کر لو
آؤ سب مل کے وفادار کا ماتم کرلو
گرفتار