Tujhe jhoola jhulaoon - Ver 2 Efforts: Syed-Rizwan Rizvi

تجھے جھولا جھلاؤں میں تجھے جھولا جھلاؤں میں خواب میں اصغرؑ تجھے لوری بھی سُناؤں پھولوں سے بھی نازک یہ تِرا سیمیں بدن ہے سورج کی تپش سے میں تجھے کیسے بچاؤں خود چل کے تُو میدان میں جا بھی نہیں سکتا کس طرح تِرا نام شہیدوں میں لکھاؤں جو بھی گیا مقتل میں نہ پھر لوٹ کے آیا کچھ دیر ٹھہر جا میں تجھے سینے لگاؤں قد سے بھی بڑا تیر تِرا چھوٹا گلا ہے کیا میں کروں تدبیر تجھے کیسے بچاؤں دو بارہ تجھے کوئی کہیں قتل نہ کر دے ڈرتی ہوں کہ کیسے میں تِری لاش چھپاؤں ننھی سی لحد بھی تِری کیا خشک رہے گی پانی تو نہیں پاس میں آنسو ہی گراؤں دل زخمی جگر زخمی مری روح بھی زخمی خوں آنکھوں سے برسا کے تِری یاد مناؤں رضوان سے ناصر سے کہیں مادرِ اصغرؑ اِس نوحے کو سُننے مَیں تِری لحد مِیں آؤں -------------------------- ۔۔۔۔۔ماں تڑپے گی جب یاد تیری آئے گی بیٹا ۔۔۔۔۔اب کون سہارا ہے مِرا مر ہی میں جاؤں ۔۔۔۔۔اِک پل بھی مجھے تیرے بِنا چین نہیں ہے ۔۔۔۔۔میں اپنا یہ دکھ کیسے ان آنکھوں میں سماؤں ۔۔۔۔۔ارمان رہا دل میں کہ ماں کہہ کے پکارے ۔۔۔۔۔دل پھٹتا ہے میرا میں اِسے کیسے مناؤں ۔۔۔۔۔پانی کے لئے بابا تجھے لے کے چلے ہیں ۔۔۔۔۔مِل جائے اگر مجھ کو تِری پیاس بجھاؤں