Haey Sajjad ki tanhayi pe rona aaya - 2
Efforts: Syed-Rizwan Rizvi

Haey Sajjad ki tanhayi pe rona aaya

Shor e matam tha idhar aur hastay thay 
Khaimay jaltay thay idhar bajay udhar bajtay thay
Waqt ko zulm ki shehnai pe rona aaya
Haey Sajjad ki tanhayi pe rona aaya

Ik rasan bara galay aur wo aseeron ki qatar
Shimr ka panja Sakina ke wo nazuk rukhsar
Natawan bhai ko ma jayee pe rona aaya
Haey Sajjad ki tanhayi pe rona aaya

Poocha Zainab ne ke kyun rotay ho bolo bhayya
Ayi aawaz ye bazaar e sitam hay behna
Bhai ko yun teri ruswayi pe rona aaya
Haey Sajjad ki tanhayi pe rona aaya

Jab sina par sar e Shabbir ko rotay dekha
Ro ke rahib ne kaha kash may andha hota
Aaj in ankhon ko beenayi pe rona aaya
Haey Sajjad ki tanhayi pe rona aaya

Uthay Sajjad jo dafna ke behan ka lasha
Asmaan roya zameen royi zamana roya
Qaid khanay ko bhi is bhai pe rona aaya
Haey Sajjad ki tanhayi pe rona aaya

Bolay Maqbool o amanat se tarrap kar ye Mujeeb
Pusht par korray barasatay hi rahay haey naseeb
Jab bhi Zainab ko gham e shah may rona aaya
Haey Sajjad ki tanhayi pe rona aaya