Darshan ka ujala le ke chalay
Efforts: Syed-Rizwan Rizvi

Darshan ka ujala le ke chalay		Ankhon may andhera chorr gaye
Akbar ko kahan ki jaldi thi		Baba ko akaila chorr gaye

Asghar ko thi ran ki dhun may kahan	Maa tak dharrktay dil ki khabar
Nanhay se sipahi khaimay may 		Thahra hua jhoola chorr gaye

Abbas ne darya cheen ke bhi		Bachon ki hi khatir mashk bhari
Pyasay thay magar pyasay hi phiray	Darya ko chalkta chorr gaye

Qaidi to bohat se dekhay hain		Poochay koi un ke jee se magar
Jo goad ke palay bachon ko		Maidan may sota chorr gaye

Sar kat ke koofay walon ne		Ye aur naya apradh kia
Maidan ki jalti reti par		Shabbir ka lasha chorr gaye