Efforts: Syed-Rizwan Rizvi
Talwar keh rahi hay kisi roza daar se
Sar ko bachaiye sitam e bad shoaar se
Jis ka khayal tha waheen talwar parr gayi
Jis may Imam surkh hua khoon ki dhaar se
Zalim ki tegh nay kia bagh-e-Nabi tabah
Doar e khizan lipat gaya barrh kar bahar se
Farq e Imam e Paak tha Quran se bhi siwa
Eeman kat gaya bin e Muljim(la) ke waar se
Dekha jo betiyon ne pidar ko lahoo may gharq
Ansoo tapak parray nigah-e-intezar se
Gul ho gaya charagh e Imamat qareeb e subh
Dunya siyah ho gayi zaalim ke waar se
Asaar e marg dekhay jo Zainab ne Shah par
Dil ki ragain ulajh gayeen ashkon ke taar se
Zikr e Ali se Fazl hay jannat teray liye
Mayoos kyon hay rehmat e Parwardigar se