Ghurbat main qatl ho gaya mazloom be watan , Main bhai bhai kehti thi laasha behen behen.
• Teeron pe tha rakha hua, laasha Hussain ka,
Dooba hua lahoo may tha kurta Hussain ka,
Aawaaz thi Hussain ki behna kafan kafan
Main bhai bhai kehti thi laasha behen behen
• Ek dil pe daagh maine bahatar utha liye
Kuch daag maine qalb ke andar chupa liye
Chupte nahin chupane se daagh-e-rasan rasan
Main bhai bhai kehti thi laasha behen behen
• Dekha hai baba main ne jo manzar bataoun kya
Naize pe tha rakha hua sar har shaheed ka
Ghodoun ke daudne se tha tukde badan badan
Main bhai bhai kehti thi laasha behen behen
• Qasim ki laash laye the daaman may shah-e-deen
Sehre se be niyaaz thi nooshah ki jabeen
Ek shab ki reh na pai na jiski dulhan dulhan
Main bhai bhai kehti thi laasha behen behen
• Barchi kaleja-e-ali akbar may jab lagi
Baba ko di sada kabhi aawaz mujh ko di
Kehta tha seena tham ke amma chubhan chubhan
Main bhai bhai kehti thi laasha behen behen
• Ghazi ke baad aur qayamat guzar gayee
Pyaasoun ki aas tooth ke ban may bikhar gayee
Ek shoor al atash ka bapa tha dahan dahan
Main bhai bhai kehti thi laasha behen behen
• Aayee na raas do ghadi pardes ki fiza
Kunba shaheed ho gaya mera ghar ujad gaya
Pardes des ghair ka apna watan watan
Main bhai bhai kehti thi laasha behen behen
|