Alam Abbas(a.s.) ka
Efforts: Nishat Naqvi

Aey Karbala bata, aey alQama bata
Aey AlQama bata, aey alQama bata

1) Tanha Hussain dekh, rahe the ye majra
   Aya tha kis tarha say, tarai me ba wafa
   aur kis tarha se khun may tar ho ke reh gaya
   Alam Abbas ka, alam Abbas ka (x2)

2) Ye wo alam hai jis say, shahidon ki shaan hai
   Qurbanion ka naam, wafaa ka nishan hai
   Bachon ki abroo hai, Sakina ki jaan hai
   Alam Abbas ka, alam Abbas ka (x2)

3) Lehra raha hai iska pharera hawaon mai
   iski bulandyo ka hai charcha fizaon mai
   sab karbala hai iskai phareray ki chaon mai
   Alam Abbas ka, alam Abbas ka (x2)

4) phaila huwa iska jo saya Hussain tak
   rasta isi ne sub ko dikhaya Hussain tak
   Hur bhi isi ko dekh kar aya Hussain tak
   Alam Abbas ka, alam Abbas ka (x2)

5) piyaso ka is alam may safina bhi dekhiye
   panjay mai roshni ka khazina bhi dekhiya
   lipti hui hai mashk-e- Sakina bhi dekhiye
   Alam Abbas ka, alam Abbas ka (x2)

6) dekh is alam kay saye mai yakja hai kon kon
   Qasim hai wahb-e-kalbiyo Aabis Umairo Aoun
   Akbar say khoob ru ke barabar kharain hain John
   Alam Abbas ka, alam Abbas ka (x2)

7) Ghazi kai khun sai jo mili hai baqa isay
   hazir ye iftikhar rahay ga sada isay
   har dor main uthayengay ahle-e-aza isay
   Alam Abbas ka, alam Abbas ka (x2)

8) bete bichar gaye hain ye dil ko malal hai
   lakin bahan ko bhai kay haq ka sawal hai
   Zainab ko har dua mai isi ka khayal hai
   Alam Abbas ka, alam Abbas ka (x2)

9) ay tashnalab wafao kay darya salam lai
   har apne soghwar ka piyasa salam lai
   ay karbala kai dast-e- burida salam lai
   Alam Abbas ka, alam Abbas ka (x2)