Amma bar bar gala mera dukhta hay
Efforts: Syed-Rizwan Rizvi



Zindane Shaam me jaha, bibi ka hay mazar
Raato ko dhimi dhimi si aati hay ek pukar
Kano se mere khoon (x2)
Abhi bhi tapakta hay, amma baar baar (x3)
Amma baar baar gala mera dookhta hay amma baar baar

Uthti hay jab bhi aah (x2)
Mera saans rukta hay, amma baar baar
Haa, amma baar baar

Soyi nahi hoo shaame gariba ke baad main
Ab kya jiyungi Shaam ke zindan ke baad main
Be aas ab hoon shahe shahida ke baad main
Saya azal ka amma (x2) mere sath chalta hay
Amma baar baar..

Kano ka khoon aankhon ke aansu se mil gaya
Har zakhm phool banke badan par hay khil gaya
Baba ko dhoond laoon ke seene se dil gaya
Be jaan mere jism (x2) may kyun dil dharakta hay
Amma baar baar..

Aey amma jab se baba se main door ho gayi
Ye zindagi mere liye naasoor ho gayi
Par kya karoon naseeb se majboor ho gayi
Hijre padar se seene (x2) me ik dard uthta hay
Amma baar baar..

Kante parre hain halq main aey amma pyaas se
Darti hoon jhonka guzre hawa ka jo paas se
Neend urrgayi hay aankhon se khawfo hiras se
Rone pe mere shimr (x2) layeen kyun jhirakta hay
Amma baar baar..

Asghar ke bad paani piyoo main nahi nahi
Ammu ke baad zinda rahoon main nahi nahi
Fariyaad kuch shaqi se karoon main nahi nahi
Paani main ab bhi chehraye (x2) Asghar jhalakta hay
Amma baar baar..

Lagta hay qaid jan se rihayi qarib hay
Aey amma jano tum se rihayi qarib hay 
Ab mout mujhko qabr ke laayi qarib hay
Daman to jal chuka hay (x2) mera dil sulagta hay
Amma baar baar..

Konain may ye kaisa hay qanoon poochiye
Marne ke baad mujhko rihayi nahin mili
Ye kaisi qaid hay ke lahad bhi yahin bani
Qaidi kabhi to qaid se (x2) ghar ko palat-ta hay
Amma baar baar..

Amma rehai paake watan tum to jaaongi
Sughra meri bahan ko gale se lagaaongi
Puchengi jab mujhe to use kya batawoongi
Reh reh ke ek sawal (x2) mere dil may uthta hay
Amma baar baar..